بـ الفترة الحالية نقرا عن مرشحين متنوعين ، ناس مختلفين بأفكارهم و تطلعاتهمـ .... منهمـ الصالح و كثير منهمـ الطالح ... !
فـ حبيت اني اقرق شوي عن كذا شخصية .. و نبدي بـ :
.
..
( 1 )
و هل يخفى القمر ؟! .. ، سيدة كل ما فيها يسبب الاندهاش بداية من مظهرها و ما يتضمنه عقلها من أفكار لا طبيعية ..... برنامجها الانتخابي عجيب أهمـ ما كان فيه :
- فتح ديسكوات بـ الديره .... ليش شبابنا يسافرون برا يغيرون جو ؟! ... بالعكس نوفر لهمـ كل شي هني منها اهمه يستانسون و نرفع اقتصادنا ... ( اي خو دهنّا بمكبتنا ! )
- الشي الحلو انها مع المرأة دائما أبدا ،.. مثلا حلات العصمة بيد المرأة ... مو بعيدة اذا دشت المجلس تشوفون بالمحاكمـ قاضية بجانب الرجل .
.
، بصراحة ما عرف وين مقرها بس من اللي قريته و سمعته عنها انها أديبة ما يندرى شصار لها بيوم من الأيام و قررت تنزل بالانتخابات !
آمنّا بالله الترشيح حق لكل مواطن و مواطنة و لكن مثل هـ الشخصية لو وصلت المجلس على الكويت السلام !
يقولون ~
رغمـ كونها ضد الرجل و هـ الشي صرحت فيه وايد ، في رياييل مؤيدينها و يبونها توصل خلف الله عـليهمـ .. !
( 2 )
ماني متحجيه عنه كـ شخص و لا عن برنامجه الانتخابي ، الصج أول مرة أعرف هـ المرشح بس استغرب شي واحد ..... من جمـ يومـ كنت قاعده اطالع تلفزيون و افرفر بالريموت إلى أن طلعت لي الراي قالوا خبر عاجل ( صادوا امرأة تشتري أصوات و بدوا يحققون معاها ) المهمـ انكشفت الحقيقة و عرفنا تشتري حق منو !
طلع المرشح يقول هاذي مكيدة و محاولة لتشويه سمعته وووو ... أشياءات أخرى !
اشوف جريدة اليوم حاط إعلان شكبره كلكمـ اهلي .. !
و الله أعلم ..
تقريبا بنفس الوقت اللي بثت فيه الراي الخبر قالوا شي ثاني جنه عن واحد أطلق النار على مبنى بـ السالمية و حاصروه الشرطة و قامـ يهدد بقتل نفسه ..
ما يندرا شصار عليه .. انتحر ما انتحر ؟!
( 3 )
مرشحة بإحدى الدوائر مسوية تحالف مع مرشحين ، يقولون وانا مالي شغل هذا حجي وصلني من ناس;p
ان كثير جدا من رجال الكويت و الدائرة اللي اهيا نازلة فيها .... يؤيدونها قلبا و قالبا ليس سبب ذلك برنامجها المذهل أو انها من سيكون على يديها التغيير لا و الله حالها من حال غيرها و لكن سبب ذلك انها حلوه و صغيره في السن !
إخص يا رجّاله !
من جانب آخر نلقى الناخبات ضدها و مستملقينها للسبب اللي ذكرته آنفا ، ( هَوْ هَوْ هذا اللي ناقص ننتخب ( ...... ) ما غيرها ! ) ... ( و الله لو شنو ماعطيها صوتي ) ، ... برافو يا ناخباتنا العزيزات مو سبب ذلك اني أؤيد رايهمـ فيها و لكن ببساطة انا ضد دخول المرأة للمجلس =)
( *** )
.
- في إحدى الدوائر نزل مرشح كان already موجود بالمجلس السابق ، و لكن بهـ الانتخابات ألحق اسمـ قبيلته باسمه لكسب أصوات القبيلة ،..... إذا كنت بتنجح خل هالشي يكون عن جدارة مالا داعي هالحركات !
- عقب اسبوع من الشيل و الحط و تلزق الصور و إقامة الخيمة ، مريت ذات يوم على مقر هـ المرشح و لقيت معظمـ البوسترات طايحه عـ الأرض ... آاآخ ليش مرشحنا طايحه صوره عـ القاع ؟!
يقولون تأثيرات الجو !
و يقولون راعي الجيب دعمهمـ بالغلط ... !
و يقولون أشياء ثانية بعد .... يمكن راعي الجيب دعمهم
بس مو بالغلط .، !
.
*********
.
أشياء وايده تنقال أيامـ الانتخابات ..... هـ الحجي يصعد ناس و يطيح بآخرين ، هل هي حقيقة أمـ محض كذب و ( بُشاعات ) ؟!
الله العالمـ ، بس ماكو دخان بدون نار على قولتهمـ .... عشان جذي لازم نصوت بضمير فـ المهمـ الكويت ، و كل أبونا جماعة من أجل هـ الديرة الطيبة فلـ نحسن الاختيار ، و احنا بحرصنا و خوفنا عليها نقدر نقومـ فيها .... فهي أي الكويت .. مسؤولية ، و فيكمـ احنا متفائلون ..
